اباي وبلىسىندا 2025-2026 جاڭا وقۋ جىلىنا دايىندىق جۇمىستارى جۇرگىزىلىپ جاتىر. بيىل ايماقتا 8 مەكتەپ رەنوۆاتسيادان ءوتىپ, 2 جاڭا مەكتەپ اشىلادى, دەپ جازادى Egemen.kz.
وبلىستىق ءبىلىم باسقارماسى باسشىسىنىڭ ورىنباسارى داۋلەت ءيلياسوۆتىڭ ايتۋىنشا, ءوڭىر جاڭا وقۋ جىلىن جاڭارتىلعان مەكتەپتەر, جاڭا كابينەتتەر, تولىق قاۋىپسىزدىك جانە جىلىتۋعا دايىندىقپەن قارسى الادى. «رەنوۆاتسيا» باعدارلاماسى اياسىندا 2025-2027 جىلدارى 75 مەكتەپ كەزەڭ-كەزەڭىمەن جاڭعىرتىلادى. بيىلدىڭ وزىندە 8 مەكتەپ تولىق جوندەۋدەن ءوتىپ, جاڭا وقۋ جىلىنا دەيىن دايىن بولادى. ونىڭ ىشىندە سەمەي قالاسىنداعى №32 ورتا مەكتەپ, جاڭاسەمەي اۋدانىنداعى تۇركسىب جانە پريرەچنوە مەكتەپتەرى, اياگوزدەگى №7 ورتا مەكتەپ پەن ق.قادىرجانوۆ اتىنداعى مەكتەپ, بەسقاراعايداعى گلۋحوۆكا مەكتەبى, ءۇرجار اۋدانىنداعى ب.مومىش ۇلى مەكتەبى بار. جوندەۋ جۇمىستارىنىڭ باسىم بولىگى 1 قىركۇيەككە دەيىن اياقتالماق.
ورىنباساردىڭ سوزىنە سەنسەك, وبلىستا ءۇش اۋىسىمدى مەكتەپ جوق.
سونىمەن بىرگە «كەلەشەك مەكتەپتەرى» ۇلتتىق جوباسى اياسىندا ەكى جاڭا مەكتەپ وقۋشىلاردى قابىلداۋعا دايىن. سەمەي قالاسى ۆودنىي كەنتىندەگى مەكتەپ 1 قىركۇيەكتە اشىلادى. اياگوز قالاسىنداعى 600 ورىندىق جاڭا مەكتەپ 2-توقساندا پايدالانۋعا بەرىلمەك. بۇعان قوسا سەمەيدىڭ شىعىس وڭ كەنتىندە 300 ورىندىق مەكتەپتىڭ قۇرىلىسى جالعاسۋدا.
– جالپى وبلىستاعى 8 200 ورىن تاپشىلىعىنىڭ 31 پايىزى وسى جوبامەن سالىنىپ جاتقان 5 مەكتەپ ەسەبىنەن شەشىلمەك. قالعان تاپشىلىقتى جويۋ ءۇشىن رەسپۋبليكالىق بيۋدجەت ەسەبىنەن الداعى ءۇش جىلدا 11 مەكتەپ سالۋ جوسپارلانعان. اپاتتى جاعدايدا دەپ تانىلعان ءۇش مەكتەپتىڭ ماسەلەسى دە كەزەڭ-كەزەڭىمەن شەشىلىپ كەلەدى. جارما اۋدانىندا 100 ورىندىق جاڭا مەكتەپتىڭ قۇرىلىسى باستالدى. اقسۋات اۋدانىنداعى ەكپىن اۋىلىندا 300 ورىندىق مەكتەپتىڭ جوبالىق قۇجاتتاماسى ساراپتاماعا جىبەرىلدى. سەمەيدەگى №11 مەكتەپتىڭ ورنىنا جاڭا مەكتەپ سالۋعا قۇجات ازىرلەنىپ جاتىر, – دەيدى ول.
ينفراقۇرىلىمدى جاقسارتۋ ماقساتىندا بيىل 12 مەكتەپكە كۇردەلى جوندەۋگە 2 ملرد 900 ملن تەڭگە ءبولىندى, ونىڭ بەسەۋى «اۋىل – ەل بەسىگى» باعدارلاماسى اياسىندا. بۇدان بولەك 174 مەكتەپتە اعىمداعى جوندەۋ جۇمىستارى جۇرگىزىلىپتى.
اباي وبلىسى